काठमाडौं— मन्त्रिपरिषदले गैरआवासीय नेपाली संघ (एनआरएन) अध्यक्ष शेष घलेलाई सरकारको विशेष दूतमा नियुक्त गरेको छ।
राष्ट्रिय पुनर्निर्माण कोषमा वैदेशिक सहयोग जुटाउनका लागि आइतबार बसेको मन्त्रिपरिषद बैठकले विदेश स्थित संघसंस्था र विदेशी दातृ निकायहरुलाई नेपालको पुनः निर्माणमा सहभागी हुन उत्प्रेरित तथा सहभागी गराउने कार्यभार सहित उनलाई सो पदमा नियुक्त गरिएको हो।
वैशाख १२ को विनाशकारी भूकम्पपछि घले नेतृत्वको एनआरएन राहत र उद्धारमा सहभागी थियो। पहिलो चरणमा १४ हजार पीडितलाई राहत वितरण गरेपछि दोस्रो चरणमा १ हजार घर निर्माणको आकांक्षा एनआरएनले देखाइरहेका बेला सरकारले उनलाई विशेष दूतमा नियुक्त गरेको हो।
घले र उनकी पत्नी जमुना गुरुङले नेपालमा निजी स्तरको सबैभन्दा ठूलो एक अर्बको परोपकारी कोष स्थापना गरेका छन् ।
अष्ट्रेलियाको सन् २०१५ का सबैभन्दा धनी २ सय व्यक्तिको सूचीमा घले ५२ करोड ८० लाख डलर सम्पत्तिसहित ९९ औँ स्थानमा छन् ।
