– पित्ताम्वर नेपाली
कैलाशबासी शिवजीकाे साह्रै प्यारो दिन ।
आयो कृष्ण चतुर्दशी फागुनको दिन ।।
बूढाबूढी भुराभुरी सधु अनि सन्त ।
रमाउँछन चारैतिर शिवजीका भक्त ।।
१
जीव जति सम्पूर्णका उनै अधिपति ।
आदिशक्ति जगदम्बा पार्वतीका पति ।।
देवताका पनि देव महादेव नै हुन ।
यो देशका राष्ट्रदेव पशुपति नै हुन ।।
२
एक भई सबै मिली भेदभाव त्यागी ।
विकृति र विसंगति सबै पोको पारी ।।
शिवधुनी लगाएर भष्म बनाउँला ।
जगत यो शिवमय छिटै बनाउँला ।।
३
भलो गर्न जगतको दु:ख झेल्नु पर्छ ।
खुसीसाथ अमृतलाई बाँडी दिनुपर्छ ।।
परि आए कालकुट विष लिनु पर्छ ।
कण्ठ हेर शिवजीको यही कुरा भन्छ ।।
४
साँढे अनि सिंह हेर सँगसँगै बस्छन् ।
सर्प अनि मयूर हेर सँगसँगै नाच्छन् ।।
मान्छेले यो बुझिदिए झगडा हुदैन ।
शिवभाव भएदेखि यहाँ के हुदैन ? ।।
५
अन्याय र अत्याचार भ्रष्टाचारलाई ।
नाश गर्दै जानु पर्छ त्रिशूल समाई ।।
शिव हाम्रो चाहना हो शिव आऊ यहाँ ।
शिव धुनी लगाउँछौं जागै बसी यहाँ ।।
६
हिमालको काखमुनि यहीं वरपर ।
डम्मरुको नयाँ नयाँ सिर्जनाको स्वर ।।
घन्काउँदै नाच तिमी संसारको माझ ।
नयाँ युग सुरु गरौं आऊ नटराज ।।
७
पोखरा ,नयाँ बजार।
