बार्सिलोना/ ‘लाप्राक नमुना वस्ती’ बोलेर मात्र हैन सबैको सहयोग र सहकार्य भए मात्र सम्भव हुने स्पेनबाट श्रमदानका लागि पुगेका एक स्वयंसेबकले बताएका छन्। गैर आबासीय नेपाली संघ राष्ट्रिय समन्वय परिषद स्पेनका सचिव सुनिल रानाभाट बुधबार निर्माणस्थल पुगे पछि लाप्राक बस्ती उठाउँन, बोले जस्तो सजिलो नभएको अनुभव सुनाएका हुन्।
पानि परे पछि गाडी चलेन करिव ५ घण्टाको पैदलमा बस्ती निर्माण भएको ठाउँमा पुगियो उनले भने,” गोर्खाको दुर्गम हिमाली क्षेत्रमा घर बनाउने एनआरएनको सोचलाई मान्नै पर्छ,तर विदेशमा बसेर लाप्राक बन्दै छ भनेर मात्र हैन,कुनै न कुनै रुपमा सबैले सहयोग गर्न सकिएन भने नमुना बस्ती उठाउँन धेरै गाह्रो छ।”
निर्माण टिममा खटिएका बद्रि राज भण्डारीले दिएको जानकारीलाई उदृत गर्दै ५ सय ७३ घरहरु मध्ये हालसम्म १ सय ३५ घरहरुमा मात्र जग हाल्ने काम सम्पन्न भएको रानाभाटले बताए। उनले भने,”निर्माण कामलाई तिब्रता दिन कामदारको संख्या थप्नु पर्छ,काम गरिरहेका स्वयंसेवकलाई पनि राम्रोसँग संयोजन गरेर परिचालन गर्न नसकेको जस्तो देखियो यो बारे पनि केन्द्रले चासो दिन जरुरी छ।”
प्रत्येक राष्ट्रिय समन्वय परिषदहरुले श्रमदानका लागि, कुनै न कुनै रुपमा स्वयंसेवक खटाउने बाताबरण तय गर्न सके मात्र निर्माण प्रक्रियालाई ठुलो सहयोग मिल्ने उनले बताए। रानाभाटले भने,” निर्माण प्रक्रियामा नेपालीसेनाको ठुलो सहयोग मिलिरहेको छ,निर्माणमा खटिएका अन्य स्वयंसेवकहरुलाई पनि संयोजन गरेर सेनाले जस्तै काम गर्ने बाताबरण तय गर्न सके बस्ती निर्माण प्रक्रियाले तिब्र गति लिने थियो।”
