एनआरएनए बिशेष महाधिवेशन आज,यस्तो छ कार्यतालिका 


बार्सिलोना। गैर आवासीय नेपाली संघ (एनआरएनए) को बिशेष महाधिबेशन आजदेखि सुरु हुँदैछ।विधान संशोधनको साझा प्रस्तावलाई बिशेष महाधिबेशनमा प्रस्तुत गर्ने सहमतिसँगै एनआरएनएनमा देखिएको विवाद समेत टुंगिएको छ।  दुईदिनसम्म भर्चुअल रुपमा हुने संघको बिशेष महाधिवेशनको उद्घाटन परराष्ट्र मंत्री प्रदीप ज्ञवालीले गर्ने कार्यक्रम तय भएको छ। 

महाधिबेशनमा ५० भन्दा बढी देशका २६ सय जना प्रतिनिधिहरु सहभागी हुने संघले जनाएको छ । जूमको माध्यमबाट आयोजना गरिने विशेष केन्द्रिय महाधिवेशनमा नवौं महाधिवेशनबाट पारित हुन नसकेको आर्थिक प्रतिवेदन र सहमतिका आधारमा तयार गरिएको विधान संशोधन प्रस्ताव माथि छलफल हुने छ। 

एक थप युवा सहित जम्मा ६ जना उपाध्यक्ष रहने, दुई सहकोषाध्यक्ष मध्ये एक महिला अनिवार्य,एक महिला सहित २ जना सचिव थप्ने,केन्द्रीय सल्लाहकार ११ जनाबाट बढाएर २१ जना बनाउने,संघका अध्यक्षले विश्वभरबाट १५ प्रतिनिधि थप्न सक्ने प्रावधान, राष्ट्रिय महाधिवेशनबाट २५ प्रतिशत प्रतिनिधि निर्वाचित गर्ने,निर्वाचन प्रक्रिया लगायतका थुप्रै परिवर्तनहरु बिधान संशोधन मार्फत हुने भएका छन्। 

संघको बुधवार बसेको अन्तराष्ट्रिय समन्वय परिषदको बैठकमा उपाध्यक्ष मन केसी तथा विधान संशोधन सुझाव समितिका संयोजक भूषण घिमिरेले प्रस्तुत गरेका बुंदाहरु विशेष महाधिवेशनमा प्रस्तुत गर्ने सहमति बनेको हो । 

यस्तो छ कार्यतालिका :-

पहिलो दिन पहिलो सत्र

कार्यक्रमलाइ संघका महासचिव डा हेम राज शर्माले संचालन गर्ने छन्। कार्यक्रमको पहिलो दिन उद्घाटन सत्रमा प्रमुख अतिथि माननीय परराष्ट्रमन्त्री प्रदिप ज्ञवालीबाट उद्घाटन,  उपाध्यक्ष रबिना थापाबाट स्वागत, प्रमुख अतिथि परराष्ट्रमन्त्रीबाट उद्घाटन मन्तब्य, बिशेष अतिथिहरुबाट शुभकामना मन्तब्य, संघका पूर्व अध्यक्षहरुबाट मन्तब्य राख्ने कार्यक्रम रहेको छ। 

त्यसपछि संघको बिज्ञ सम्मेलन २०२० बाट तयार पारिएको स्वेत पुस्तिका नेपाल सरकारलाइ हस्तान्तरण गरिनेछ। यसका साथमा उद्घाटन सत्रलाइ अध्यक्षता गरेका संघका अध्यक्ष कुमार पन्तले धन्यवाद मन्तब्य सहित पहिलो दिनको पहिलो सत्रको समापन भएको घोषणा गर्नेछन्। 

पहिलो दिन दोश्रो सत्र

संघका महासचिव डा हेम राज शर्माले संघको प्रतिवेदन प्रश्तुत गर्नेछन्। प्रतिवेदन माथि छलफल हुनेछ। त्यसपछि प्रतिवेदन पारित गर्नको लागि प्रस्ताव गरिनेछ।यसपछि पूर्व प्रवक्ता भुषण घिमिरे बिधानको मस्यौदा प्रति छलफलको लागि प्रस्तुत गर्नुहुनेछ। प्रस्तावित मस्यौदाका हरेक बुँदागत प्रस्तुति गर्दै बिधान संसोधन मस्यौदाको नियमित छलफलबाट हुनेछ। छलफल सम्पन्न भएपछि बिधानको जुम हलबाट सहमति भएको अन्तिम संसोधित मस्यौदा पढेर सुनाइने छ। सो को सर्वसम्मत भएको खण्डमा मस्यौदा बिधान पारित गर्नको लागि प्रस्ताव गरिनेछ। साँझ ५:०० बजे पहिलो दिनको सत्र अध्यक्ष कुमार पन्तले पहिलो दिनको समरी सहित समापन भएको घोषणा गर्नेछन्। 

दोश्रो दिनको पहिलो सत्र

बिहान ११:०० बजे दोश्रो दिनको पहिलो सत्र सुरु हुनेछ। दोश्रो दिनको पहिलो सत्रमा संघका कोषाध्यक्ष महेश श्रेष्ठले संघको २०२७-२०१९ को आर्थिक गत महाधिवेशनमा पारित हुन बाँकी रहेको प्रतिवेदन प्रस्तुत गर्नेछन्। प्रतिवेदन माथि छलफल पछि पारित गर्नको लागि प्रस्ताव गरिनेछ। त्यसको लगत्तै गैरआवासीय नेपाली संघका लेखा परीक्षकले २०२७-२०१९ को लेखा परिक्षण प्रतिवेदन प्रस्तुत गर्नेछन्।  त्यसपछि आगामी कार्यकालको लागि नयाँ लेखा परीक्षकको मनोनय गर्न नाम प्रस्ताव गरिनेछ। जुम हलबाट सो पारित गर्नको लागि प्रस्ताव गरिने छ। यसका साथमा नेपालमा गैरआवासीय नेपालीहरुको लगानी संबन्धि प्रस्तुति समेत रहने छ।  

दोश्रो दिन दोश्रो सत्र

बिशेष महाधिवेशनको दोश्रो दिनको दोश्रो सत्र छोटो र छरितो हुनेछ। संघका प्रवक्ता डिबी क्षेत्रीबाट महाधिवेशनको समरी, घोषणा सहित ब्रिफिंङ्ग हुनेछ। त्यसपछि संघका अग्रज लगायतको मन्तब्य रहनेछ। अन्त्यमा अध्यक्ष कुमार पन्तबाट महाधिवेशनको समापनको संबोधन सहित बिशेष महाधिवेशन २०२१ लाइ सपान भएको घोषणा गर्नेछन्।